နီၣ် တ ယၢ် မ့ၢ် တၢ် ပ နီၣ် လၢ အ အိၣ် ဒီး အ ခီ ပ ညီ လၢ အ ဒိၣ် အ ယိာ်, အိၣ် ဒီး တၢ် ပ ညိၣ် ကွၢ် စိ တ ဖၣ် ဘၣ် ထွဲ ဒီး အ တၢ် က ရၢ က ရိ, အ ထံ အ ကီၢ် ဒီး အ ပှၤ က လုာ် န့ၣ် လီၤ. ပ ၀ဲ က ညီ ဖိ တ က လုာ် အံၤ ပ ပာ် က ဖၢ လၢ ပ သး အ လီၢ် အိၣ် ၀ဲ, အ ဂ့ၢ် ဒ် အံၤ, ပ အိၣ် ဒီး ပ နီၣ် တ ယၢ် ဒီး ပှၤ သ့ၣ် ညါ ပှၤ လၢ ပ နီၣ် တ ယၢ် အ ဃိ လီၤ.
"က ညီ ဒီ က လုာ် က ရၢ" (Karen National Association) အိၣ် ထီၣ် ဖဲ ၁၈၈၁ နံၣ် လၢ အ ဘၣ် တၢ် တီ ခိၣ် ရိၤ မဲ, ဒုး အိၣ် ထီၣ် အီး လၢ က သံၣ် သ ရၣ် ထံၣ် သၣ် ပၠၣ် န့ၣ် လီၤ. က ညီ ဖိ တ ဖၣ် အိၣ် ဃူ လိာ် ဖိး လိာ် အ သး လၢ က ရၢ အံၤ အ ပူၤ ဂ့ၤ မး လီၤ.
ဖဲ (၁၉၃၀-၃၈) နံၣ် အ ပူၤ ဒီ က လုာ် က ရၢ အ ခိၣ် (ပှၤ ပၢၤ လီၢ် ဆ့ၣ် နီၤ) သ ရၣ် စၣ် ဘီၣ် ဂုာ် ကျဲး စၢး ၀ဲ ဒ် သိး က ညီ နံၣ် ထီၣ် သီ, က ညီ အ နီၣ် တ ယၢ်, က ညီ ဒီ က လုာ် တၢ် သး ၀ံၣ် က အိၣ် ထီၣ် လီၤ. ဒ် သိး က ညီ အ နီၣ် တ ယၢ် က အိၣ် ထီၣ် အ ဂီၢ်, ဘိး ဘၣ် သ့ၣ် ညါ လီၤ ၀ဲ ဆူ ထံ ကီၢ် ပူၤ ယၢ် ခီ ယၢ် ခီ လၢ ပှၤ က ဆှၢ ထီၣ် က ညီ အ နီၣ် တ ယၢ် အ ဒိ ဒီး ဆှၢ လီၤ အီၤ ဒီး နီၣ် တ ယၢ် လၢ အ ဘၣ် တၢ် ဃု ထၢ အီၤ န့ၣ်, က ဒိး န့ၢ် ဘၣ် ခိၣ် ဖး န့ၣ် လီၤ.
နီၣ် တ ယၢ် အ ဒိ လၢ အ ဘၣ် တၢ် ဆှၢ လီၤ အီၤ အိၣ် ၀ဲ တ က ယၤ ဃၣ် ဃၣ် လီၤ. လၢ အ ကျါ ဘၣ် တၢ် ဃု ထၢ အီၤ (၃) ဘ့ၣ် န့ၣ် လီၤ. တၢ တ ဘ့ၣ် မ့ၢ် ၀ဲ မါ ဘး ခ့ၣ် အ တၢ် ဟ့ၣ် ထီၣ် လၢ အ အိၣ် ဃုာ် ဒီး ကျိာ် အ ဂီၤ, မၤ န့ၢ် ခိၣ် ဖး တၢ, ဒီး ခိၣ် ဖး ခံ မ့ၢ် ၀ဲ သ ရၣ် ဒိၣ် မိ လိၤ အ တၢ် ဟ့ၣ် ထီၣ် လၢ အ အိၣ် ဃုာ် ဒီး မုၢ် ဟဲ ထီၣ် သီ အ ဂီၤ, မ့ မ့ၢ် ခိၣ် ဖး သၢ န့ၣ် မ့ၢ် ၀ဲ က သံၣ် သ ရၣ် ဒွ့ အ တၢ် ဟ့ၣ် ထီၣ် အိၣ် ဒီး က ဆီ ၀ါ အ ဂီၤ န့ၣ် လီၤ.
ဒီ က လုာ် အ နဲၣ် ရွဲၣ် မါ ဘး ခ့ၣ် ဟံး န့ၢ် နီၣ် တ ယၢ် အ ဒိ (၃) ဘ့ၣ် အံၤ ဒီး ဒုး ကဲ ထီၣ် အီၣ် တ ဘ့ၣ် ဃီ ဒီး ဆှၢ နုာ် ပာ် ဖျါ ၀ဲ ဆူ ဒီ က လုာ် က ရၢ ဒီး ဒီ က လုာ် က ရၢ တူၢ် လိာ် ပာ် ဂၢၢ် ပာ် ကျၢၤ နီၣ် တ ယၢ် န့ၣ် လီၤ. နီၣ် တ ယၢ် အံၤ မ့ၢ် ဒ် ပ ထံၣ် ဘၣ် လၢ မုၢ် မ ဆါ တ နံၤ အံၤ အ သိး လီၤ.
လၢ နီၣ် တ ယၢ် အ လိၤ ပ က ထံၣ် ဘၣ် အ လွဲၢ် သၢ က လုာ်, အ ဂီၤ, အ ၀ါ, ဒီ အ လါ အဲး, အိၣ် ဒီး မုၢ် ဟဲ ထီၣ် သီ အ ယဲၤ (၉) ဘိ ဒီး ကျိာ် အ ဂီၤ န့ၣ် လီၤ. မါ ဘး ခ့ၣ် လၢ အ မ့ၢ် ဒီ က လုာ် နဲၣ် ရွဲၣ် ဟံး န့ၢ် တ့ ထီၣ် က့ၤ တ ဘ့ၣ် ဃီ အိၣ် ဒီး အ ခီ ပ ညီ အ ကံၢ် အ လဲ ဒ် လာ် အံၤ အ သိး လီၤ.
- အ လွဲၢ် အ ဂီၤ, မ့ၢ် တၢ် ပာ် ဖျါ တၢ် သူၣ် ဒူ သး ဒူ အ ပ နီၣ်
- အ လွဲၢ် အ ၀ါ, မ့ၢ် တၢ် ပာ် ဖျါ တၢ် သူၣ် လိၤ သး ဘျၢ, သူၣ် စီ သး ဆှံ, သူၣ် က ဆှဲ သး က ဆှီ အ ပ နီၣ်
- အ လွဲၢ် လါ အဲး, မ့ၢ် တၢ် ပာ် ဖျါ တၢ် တီ တၢ် လိၤ အ ပ နီၣ်
- မုၢ် ဟဲ ထီၣ် သီ အိၣ် ဒီး အ ယဲၤ (၉) ဘိ ပာ် ဖျါ က ညီ ဖိ အ တၢ် အိၣ် ဆိး လီၢ် (၉) တီၤ ဒီး က လဲၤ ထီၣ် လဲၤ ထီ, က ပီၤ ထီၣ် ဒ် မုၢ် အ တၢ် က ပီၤ အ သိး န့ၣ် လီၤ.
- ကျိၣ် မ့ၢ် တၢ် ဃူ တၢ် ဖိး အ ပ နီၣ် ဒီး က ညီ ဖိ အ တၢ် ဆဲး တၢ် လၤ, တၢ် န့ၢ် သါ လုၢ် ဒိၣ် ပှ့ၤ ဒိၣ်.
Comments
Post a Comment